රාගිනි

මා රාගිනියට පෙම් බදීදැයි සිතේ..

මේ වදන් පෙල දැකිත්ම ශ්‍රීනිවාසන්ට මෙන්ම මටද පිස්සුයැයි ඔබ සිතනවා විය හැකිය.. ඇය යකින්නකි.. එය සත්‍යකි.. නමුදූ ඈ මනුශ්‍ය හදවතකටත් එහා ගිය ප්‍රේමයක් පිරූ යකින්නකි.. එය බොහෝ දෙනෙක් පිළිගනීදැයි මා නොදනිමි.. එහෙත් මගේ හිත එය පිළිගැනීමට සූදානම්ය.. එහෙයින් මගේ සිතේ රාගිනියට ආදරයක් ඇති වීම පුදුමයක්යැයි මා නොසිතමි.. යකින්නක් වුව, ඇගේ ගතිපැවතුම් මගේ හිතේ විශේෂ තැනක් ගැනීමට සමත් වූ බව කිව යුතුමය.. ඒ ගතිගුණ බොහෝ කල් සිටම මා සෙවූ ඒවාදැයි සිතෙන තරමටම ඈ මගේ සිත තුලට කා වැදී ඇත..

ඈ රූමත් විය හැක.. එහෙත් අකුරු අතරේ මවන්නට උත්සාහ කල ඒ රූමත් කම මාහට එතරම්ම ඉස්මතුව නොපෙනින.. ඒ ඇයිදැයි මා නොදනිමි.. ඒ ගැන සිතන්නටද මම කාලය වැය නොකරමි.. විරූපීයැයි හැමෝම සිතූ ඔහුට පෙම් කරන්නට සිතූ ඇගේ සිතේ රූමත් බව විනා ඇගේ පෙනුම කෙබදුදැයි සිතීම නිශ්පලයැයි සිතේ.. නමුදු ඇය යකින්නකි.. ඇගේ ශාපයෙන් මිදෙන්නට ආ යකින්නකි..

මට තවත් රාගිනි තුලට එබෙන්නට ඇත්නම් යැයි සිතේ.. ඒ බොහෝ තැන් වලදී ඈ තුලින් මට මාවම කතාව තුලට ගෙන ඒමට හැකියාව ලැබූ හෙයිනි.. එය කොතරම් සාර්ථකදැයි මා නොදනිමි.. එහෙත් එසේ කරනට මා කිසිසේත්ම පසුබට නොවූවෙමි.. එහෙත් මා තුලින් වඩාත් ඉස්මතුවූයේ ශ්‍රීනිවාසන්යැයි සිතීම වඩාත් සුදුසුය.. සැකය හැරෙන්නට අනික් සෑම අතකින්ම මා ඔහුට සමානය.. එහෙයින් මට රාගිනියට පෙම් කිරීමට අයිතියක් ඇත.. මා ඇයට පෙම් කරමි.. ඇය යක්ෂණියකි.. ඒ මා හැරුණු කොට සිටිනා අනික් ලෝකයාට පමනී..

පලු ගසේ සංගීතය ගැන මා දන්නා මුත් එය ගැන කතා කිරීමට මට සිත් නොදේ.. එය හුදෙක් අතීතයක් පමණක්මය.. එහෙයින් මා එය අමතක කරලන්නට උත්සාහ දරමි.. බොහෝ දුරකට මා ඊට සමත් වන මුත් අසමත් වන අවස්ථාද නැතැයි කීම මුසාවකි.. යඟදාවකින් වැරෙන් ඔළුවට ගසන්නාක් මෙන් මොහොතකින් හැම දෙයක්ම මොළය පුරා දිවුවද නෙතු ලගට එන නුඹ ඒ හැමදෙයක්ම මගෙන් අරගෙන මා සතපවන්නේ දෙවඟනක් මෙන්ය.. එය මායාවක්ද මා නොදනිමි.. නමුදු මා එයට පෙම් කරමි.. ඒ සැනසුමට පෙම් කරමි..

රාගිනිය තුල වූ සියුම් හදවත මා දැකීමට උත්සාහ කරමි.. එය අන් කාටවත් නොපෙනන බව මා දනිමි.. අන් හැමෝටම ඈ දෙපා පොළව මත නොගැටෙන තැනැත්තියක වුවද මට ඉන් පලක් නැත.. ඇයට පෙම් කරනුයේ මා පමනකි.. ඇය පෙම්කරන්නේද මට පමනකි.. එය ඇයද හොදින්ම දැන සිටින්නීය.. පලු ගසේ සංගීතයට එහා ගිය සොදුරු මිහිරි කවිකමක් ඈ මා තුලින් විදිමින් සිටින්නීය.. ඇය හුදී ලෝකයාට නොපෙනෙන බව දැන ගැනීමට ගෙවුන කාලය ප්‍රමාණවත්ය.. ඔවුනට මගේ විරූපි බව ගැටළුවක්ය.. පලු ගසේ සංගීතය අතරින් මා මරන්නැයි අනේක විට කීවද එය නොඇසෙන සේ හිදීමට තරම්ම නුඹ වෙනස් වී ඇත.. නුඹ මා හා පෙමින් වෙලී ඇත..

මාද එසේමය.. එහෙත් එක් වෙනසක් ඇති බව පිළිගතම යුත්තේය.. සපුරන්නට ආසාවෙන් බොහෝ කල් බලා හිදි එක් පැතුමක් නිතර හිත පාරවන්නේය.. එය නුඹට තේරුම් ගත් හැකිදැයි මා නොදනිමි.. එසේ වීනම් මා සතුටින් ඉපිලෙන තරම නුඹටද සිතාගත නොහැකිය.. නමුදු එය එසේ නැත.. නුඹට මා සිත කියවන්නට නොහැක.. ආත්මයේ සිට දවාගෙන මුළු ගතම පෙලන ඒ හැගීම නුඹට කෙදිනක හෝ නොහැගෙනු ඇත.. මා සැබවින්ම දැවේ.. එහෙත් එය යටපත්කරනු විනා කල හැක්කක් මා නොදනිමි.. ඒ මා නුඹට පෙම් කරන බැවිනි..

මනසේ සුන්දරත්වයට පෙම් කල යුතු බව මා සිතට කා වැදුන දින සිටම මා දැවෙන ගින්න යටපත් කිරීමට මා බොහෝ උත්සාහ කලෙමි.. අවසානයේ මා සාර්ථක වීමී.. එහෙත් අවසානයේ මා නුඹ ලග අසාර්ථක වන විට යටපත් කර ගත් ගින්නෙහිම මා තව තවත් දැවෙන බව මා හොදින්ම දන්නෙමි.. එහෙත් එය නුඹට නොවැටහෙනු ඇත.. එය එසේ වේනම් මා සතුටු වෙමි.. මන්දයත් මා නුඹට පෙම් කරමි.. සැබවින්ම පෙම් කරමි.. නුඹ යක්ශියක නොවන බව මා ස්තීරවම දන්නේය.. එය අන් අයට තේරුම් කිරීමට මා හට කිසිදු උනන්දුවක් නැත්තේය.. රහසේම මා නුඹට පෙම් කරමි.. සදා නොවෙනස්ව මා නුඹට පෙම් කරමි..

රාගිනිය,
ම්රුදු මොලොක් සිත්වලට
ආදරය තවරා පල කිම.
වැරෙන් මුගුරු අරගෙන
නුඹ නසන්නට
උන් එනකොට..

සගවමු සත්‍ය
අදුරු ගල් ගුහාවක
පන්සක වසරක පෙම
ලියමු ගලන දිය මත
හිස් වුන හදවතට මට
ඉඩ දෙන්න කාව්‍යක් ලියන්න..

නුඹ දෙපා ගැටේවි
යලිදු මේ පොළව මත
ප්‍රේමය හැරදා නොයාවි
ගෙවුන සක වසර තරමට
ඉඩ නොදෙමි මම පාව යන්නට
දුම් වළාවක්ව නුඹට අහසට..

( ටික කාලෙකට උඩදී එක හුස්මට ආසාවෙන් කියවපු පොත ගැන එවෙලම හිතට ආව සිතුවිල්ලකි )

Asantha K Umagiliya සහෝදරයා විසින් පොත් කියවන අය ෆේස් බුක් සමාජයේ පල කරන ලද ලිපියකි...

පැන් කෙණ්ඩිය පම්පෝරියක් විතරයි! (විචාරය)

පැන් කෙණ්ඩිය පම්පෝරියක් විතරයි!
දිනමිණ ජුලි 01 2015

චම්මින්ද වෙලගෙදර මහතාගේ අභිනව ප්‍රබන්ධය ‘පැන් කෙණ්ඩියක්’ යනුවෙන් නම් කර තිබේ. වරෙක එය යොවුන් නවකතාවකට සමීප වෙයි. කර්තෘ ස්වකීය ළමා විය හා යොවුන්විය මේ කතාවට විෂයය කරගන්නා බැවිනි. තව වරෙක මාර්ටින් වික්‍රමසිංහ මහතාගේ “මඩොල් දූව” අප සිහියට නැ‍ඟේ. ඊට සමාන ආකෘතියක් මෙහි භාවිත බැවිනි. තවත් වරෙක එය චරිත කතාවක ලක්ෂණ ප්‍රකට කරයි. කථකයා තමන්ගේ ම අත්දැකීම් ඒ අයුරින් ම වාර්තා කරන බැවිනි.

චම්මින්ද වෙලගෙදර මහතා නූතන ප්‍රබන්ධ කථාවේ ශිල්පීය ලක්ෂණ මුළුමනින් ම පාහේ අමතක කොට; කතාන්දරයක විලාසයකින් තම කතාව කියාගෙන යයි. ඇතැම් විට පැරැණි චාරිත්‍ර හා සම්ප්‍රදායයන් විස්තර කිරීම සඳහා විශාල ඉඩක් වෙන් කරයි. කුතුහලය දනවන කතාවක් එහි නැත. ගැටුමක් ද නැත. එහෙත් අතීත කාමයක් ඇත. කර්තෘ පෙරවදනෙහි ලා එය දක්වා ඇත්තේ මේ අයුරින් ය.

“මා විඳි මගේ සුන්දර බාල විය මගේ දරු මුණුබුරන්ට විඳින්නට ඉඩ ලැබුණේ ද, ලැබෙන්නේ ද යන්න ඒ කෙනිත්තිල්ලයි. එය මගේ දරු මුණුබුරන්ට පමණක් නොව; මේ රටේ සියලුම දරු මුණුබුරන්ට පොදු වූ න්‍යායයක් බවට පත් ව ඇත.”

චම්මින්ද වෙලගෙදර“එහි දී වැඩිහිටියකු ලෙසින් මා කුමක් කළ යුතු ද? ආපසු හැරී බලන කල මහා ශක්තියක්, අපේකමත් දෙන ඒ අත්දැකීම් ඔවුන්ට කියවීමට හෝ දීමට ලැබේ නම්, එය යහපතක් නො වේ ද? අද ඉතා කාර්යබහුල යාන්ත්‍රික සමාජ සත්ත්වයකු වෙමින් සිටින ඔවුන්ට මෙවැන්නක් විඳීමේ කාල පරාසයක් හෝ මානසික ඉසිඹුවක් හෝ අභිරුචියක් වෙත් ද?’

(මගේ කියවීම)

තලතුනා වයසේ පසුවන මහත්වරුන් නඟන පොදු තර්කයක් මේ කර්තෘවරයා ද ගෙනහැර දක්වයි. එනම්; අතීතය සන්සුන් ය. වර්තමානය යාන්ත්‍රික ය. අතීතය ඉතා සුන්දර ය. වර්තමානය අතිශය කටුක ය. අතීතය ශික්ෂාකාමී ය. වර්තමානය අශික්ෂිත ය. අතීතය මුදලට යට වූයේ නැත. වර්තමානය මුදලට යට වී ඇත. මේ අඩු - වැඩිය චම්මින්දගේ මල්ලෙහි තිබේ. ඉතිහාසය නිරූපණය කිරීම හා ඉතිහාසයෙන් පාඩම් උකහා ගැනීම නරක නැත. එය එක්තරා විලාසයෙකි. එහෙත් අතීත - කාමයට ගැතිවීම වෙනත් විලාසයෙකි. සමාජ පරිවර්තනය නොරුස්නා ග්‍රාම්‍ය ගතියක් එහි පවතී. නූතන පරපුරේ තාක්ෂණික භාවිතය හා විලාසිතා දෙස ඉවසී‍ෙමන් බැලීමක් වැඩිහිටියන් තුළ නැත. කර්තෘ ද ඒ ගණයට අයත් පුද්ගලයෙකි. “ නුඹලා පොතකින් හෝ අපේ අතීතය විඳපල්ලා! එය අති විශිෂ්ට යි’, යනුවෙන් චම්මින් ද නූතන පරපුරට ඇඟිල්ලෙන් අනියි. එහෙත් අපගේ අත්දැකීමට අනුව නූතන තරුණ පරම්පරාව පොත් කියවන්නේ නැත. මෙබඳු පොත් කොහොමටවත් කියවන්නේ නැත.

චම්මින්ද රචනා කර ඇත්තේ නවකතාවක් නොවේ යැයි කෙනකුට තර්ක කළ හැකි ය. එහි නවකාවක ලක්ෂණ නැත. ඔහු තමාගේ අතීත පම්පෝරිය විදහා දක්වන කතාන්දරයක් කියාගෙන යයි. එය බොහෝ විට නීරස ය. ආකර්ෂණයෙන් තොර ය. කියැවීම වෙහෙසකර ය.

නවකතාව කතාන්දරයෙන් වෙනස් වන ප්‍රධාන ලක්ෂණ ගණනාවක් තිබේ. ඒ අතරින් ප්‍රධාන වන්නේ නිරූපණය, ආකෘතිය හා සන්දර්භය යි. කතාන්දරය කිසියම් සිදුවීම් මාලාවක් විස්තර කරන අතර නවකතාව තෝරාගත් ප්‍රබල සිද්ධි නිරූපණය කර පෙන්වයි. හෙවත් ජීවමාන කර දක්වයි. කතාන්දරයකට වඩා නවකතාවකින් හැඟීම් දැනවීමක් අපේක්ෂා කරයි. එලෙස ම නවකතාව ජීවිතය පිළිබඳ හැඳෑරීමක් හා ජීවිතය පිළිබඳ ගැඹුරු කියැවීමක් ලෙස ද සලකති. ආකෘතිය අතින් ගත් කල කතාන්දරයෙහි ඇත්තේ මුල - මැද - අග සම්බන්ධයක් සහිත ක්‍රමික විකාශයෙකි. නූතන නවකතාව එවැන්නක් අපේක්ෂා කරන්නේ නැත. සන්දර්භය හා අන්තර්ගතය අතින් ගත් කළ නවකතාව පුද්ගල ජීවිතය විශ්ලේෂණය කරයි. සමාජය වි‍ශ්ලේෂණය කරයි. එහි ඇත්තේ ගැඹුරකි. පාඨකයා නවකතාවෙන් සියුම් රසවින්දනයක් ගැඹුරු ජීවිතාවබෝධයක් මෙන් ම දැනුම් සම්භාරයක් ද ලබයි. විශේෂයෙන් සාර්ථක නවකතාවකින් පාඨකයාගේ වින්දනය හා චින්තනය දියුණු කරයි. කතාන්දරය ඇත්තේ ඊට වඩා සරල හා ප්‍රාථමික තැනක ය. චම්මින්දගේ ප්‍රබන්ධය කතාන්දරයකින් ඔබ්බට ගමන් කරන්නේ නැත.

ප්‍රථම පුරුෂ දෘෂ්ටි - කෝණයෙන් රචනා වී ඇති මේ ප්‍රබන්ධය කර්තෘගේ ළමා අවදිය හා යොවුන් අවදිය විස්තර කරයි. අර්ධ -වියළි ප්‍රදේශයක ගමක් මූලික කොට කතාන්දරය දිග හැරෙයි. කථකයා පිළිබඳ අනවශ්‍ය විස්තර රාශියක් එහි තිබේ. ගමට වැඩි වශයෙන් බලපාන දේශගුණය කර්තෘගේ අවධානයට ලක් ව තිබේ. වර්ෂා කාලය හා වියළි කාලයත් (නියඟය) කර්තෘ විස්තර කරයි. එහෙත් පරිසරයේ වෙනස්වීමේ ඒ - ඒ චරිතවලට බලපාන ආකාරය සියුම් ලෙස චිත්‍රණය කිරීමට කතුවරයා උත්සාහ කරන්නේ නැත.

“ ඊට මාස ගාණකට පස්සේ තමා ඉඩම් වලට අවසරේ ආවේ. හා හා පුරා කියලා ගමේ ඇත්තෝ කැලේ එළිපෙහෙළි කරන්ඩ යන්න ඉස්සරින් පන්සලේ ලොකු පින්කමක් වාගේ. කැවුම්, කිරිබත් උයලා ලොකු හාමුදුරුවො ඔක්කෝටම පිරිත් කිව්ව. කට්ටියම ගියේ බයිසිකල්වල. හැම බයිසිකලේම පොරවයි,කැත්තයි, පිහියයි ගානේ. කැති පිහියා අලුතින් මුවහත්තියල උදේ හිරු එළියට දිලිසෙනවා. බයිසිකල් නැති අය හීං හිමිදිරියෙම පයින් ම ගිහිල්ලලු.”

(පිටුව 120)

කර්තෘගේ අදහස වන්නේ පාඨකයා ගම ගැනත් ගමේ සංස්කෘතිය ගැනත් කිසිවක්ම දන්නේ නැති බව ය. එබැවින් ඔහු සියල්ල විස්තර කරයි.

මේ ප්‍රබන්ධය ජනශ්‍රැති කේන්ද්‍ර කොටගත් ප්‍රබන්ධයක් ලෙස කෙනකු වැරැදි වැටහීමක් ඇති කර‍ගත හැකි ය. නූතන ලෝකය ජනශ්‍රැති අධ්‍යයනයෙහි ලා බලවත් උනන්දුවක් දක්වති. එය සංස්කෘතික අධ්‍යයනයට අයත් පුළුල් විෂය ක්ෂේත්‍රයෙකි. ජනශ්‍රැති ආශ්‍රයකොට ලියැවුණු අපූරු ප්‍රබන්ධවලට හොඳ ප්‍රතිචාර මෙන්ම හොඳ ඉල්ලුමක් ද තිබේ. අරාබි සංස්කෘතිය, අප්‍රිකානු සංස්කෘතිය හා ලතින් අමෙරිකානු සංස්කෘතිය මේ අයුරින් නව ප්‍රබන්ධවලට විෂය වී තිබේ. අරාබි ජනකවියක් ආශ්‍රය කොට ගෙතුනු අපූරු ප්‍රබන්ධයක් අප සිහියට නැඟේ. එය “Layla and Majnun” ය. මේ ප්‍රබන්ධය ලෝකය පුරා ඉංග්‍රීසි පාඨකයන් අතර බෙහෙවින් ජනප්‍රිය වේ. තවදුරටත් එය භාෂා විසි ගණනකට පරිවර්තනය වී ඇත. එය එක අතෙකින් ආදර වෘත්තාන්තයකි. තව අතෙකින් මනෝවිද්‍යාත්මක නවකතාවේ ලක්ෂණ ප්‍රකට කරන ප්‍රබන්ධයකි. ජනශ්‍රැති ආශ්‍රය කොට ලියැවුණු සාර්ථක නවකතා සිය ගණනක් ලෝක සාහිත්‍යය තුළින් උකගා ගත හැකි ය.

ජනශ්‍රැති ආශ්‍රය කිරීමට චම්මින්ද පෙලැඹී නැත. ඒ වෙනුවට ඔහු සිදු කර ඇත්තේ එක්තරා ගමක තත්කාලීන පසුබිම විස්තර කිරීම ය. ගම නවකතාකරුවන්ගේ ජනප්‍රිය විෂයයක් බවට පත්වූයේ 1960 ගණන්වල සිට ය. ගමෙන් නගරයට ප්‍රවේශ වන පුද්ගලයා විකාරකාරයකු හා වංක පුද්ගලයකු වන බව බොහෝ නවකතාකරුවන් කියා ඇත. රටේ උරුමය හා සාංස්කෘතික හර පද්ධතිය ඇත්තේ ගැමි සමාජය හෙවත් ගම තුළ පමණකැ’යි සමහරුන් කියා ඇත. ශ්‍රී ලංකාවට අනන්‍ය පෞරුෂයකින් යුතු මහා චරිත බිහි වන්නේ ගම ආශ්‍රය කිරීමෙන් පමණකැ’යි තව සමහරුන් කියා ඇත. ගම ශ්‍රී ලංකාවේ මූලය බව ද ගම නාගරීකරණයට පත්වීමෙන් රට විනාශ වන බව ද තවත් සමරුන් කියා ඇත. මේ සියල්ල බේගල්ය. ඔවුන් තම සිතැඟි ප්‍රකාශයට පත් කර ඇත්තේ නැවත විමසා බැලීමකින් තොරව ය. ගම හුවා දැක්වීමෙන් සිදුවන වාසිය කුමක්දැ’යි නිශ්චිතවම කිව නො හැකි ය. එහෙත් එය මෝස්තරයක් ලෙස දිගින් - දිගට ම පැවැතිණි. චම්මින්දගේ‍ මේ නව කතාව ද එහි ප්‍රතිඵලයෙකි.

“පැන් කෙණ්ඩිය” නම් ප්‍රබන්ධය නවකතාවක් ලෙස සලකන්නට පුළුවන්කමක් නැත. එහෙත් එය ගම හා නිදහසින් පසු ග්‍රාමීය සමාජය විශ්ලේෂණය කරන කෙනකුට යම් අයුරකින් ප්‍රයෝජනවත් විය හැකි ය. එය ක්ෂේත්‍ර කිහිපයක් ඔස්සේ විහිද යයි.

(I) ප්‍රාදේශීය භාෂා ප්‍රයෝග අධ්‍යයනය කිරීම

(II) වී ගොවිතැන හා‍ හේන් ගොවිතැන පිළිබඳ ඥානයක් ලබා ගැනීම

(III) ගැමි දරුවන්ගේ කෙළිලොල් ජීවිතය වටහා ගැනීම

(IV) මා-පිය, දූ -දරු සබඳතා ග්‍රාමීය සංස්කෘතිය තුළ වටහා ගැනීම

එක අතෙකින් බලන විට චම්මින්ද එළි දක්වන තොරතුරු නාගරික සමාජයට යම් ආධුනික බවක් තිබෙන්නටත් පුළුවන. එහෙත් සමස්තයක් ලෙස ගන්නා කළ සිංහල පාඨකයා ගම නොදන්නා කෙනකු ලෙස සැලැකිය නො හැකිය. කුමක් වුව “පැන් ‍කෙණ්ඩිය” ප්‍රබන්ධ තුළ විශාල තොරතුරු සමූහයක් ද තිබේ. එය බොහෝ දෙනකුට ගම අධ්‍යයනය කිරීමට වැදගත් වන්නටත් පුළුවන. ඒ හැරෙන්නට නවකතාවකින් ලැබෙන ප්‍රහර්ශය හෝ ගැඹුරු ජීවිතාවබෝධය මේ ප්‍රබන්ධයෙන් ල‍ැබෙන්නේ නැත.

රන්ජන් අමරරත්න

-සමන් නන්දලාල් මහත්මයා විසින් පොත් කියවන අය ෆේස් බුක් සමාජයේ පලකරන ලදී-

සැබෑ මිනිසෙකුගේ කතාවක්

නම - සැබෑ මිනිසෙකුගේ කතාවක්
කතෘ - බරිස් පලෙවොයි
පරිවර්තනය - දැදිගම . වී . රුද්‍රිගූ
ප්‍රකාශනය - සුසර ප්‍රකාශකයෝ
මා සතු පිටපතේ මුද්‍රණය - 2012
මා සතු පිටපතේ මිල- රු 480/- (මෙම මිල මුද්‍රණය අනුව වෙනස් විය හැක)
ISBN – 978-955-676-454-3

අලෙක්සේයි මරේසියෙව් නම් රුසියානු සෙබලා දෙවන ලෝක සංග්‍රාමයේදී ඇඩොල්ෆ් හිට්ලර්ගේ ජර්මානු යුධ සේනාංක හා සටන් වැදී සිදු වූ ගුවන් අනතුරකින් දෙපා අහිමි වූවෙකි. සතුරු වෙඩි පහරකින් තම ගුවන් යානය වනයට කඩාවැටීමෙන් අතරමංවන මොහු තම රිදුම් දෙන තුවාල වූ ඇට කටු බිඳී ගිය දෙපයත්, හිමෙන් වැසී ගිය කටුක දේශගුණික තත්වයත්, බඩගින්නක් , උසුලාගෙන සති දෙකකටත් වඩා කාලයක් තම සගයින් සොයමින් ගමන්ගනී. කැලේ සැගවුනු රුසියානු ගැමියන් පිරිසක් විසින් ඔහුගේ දිවි බේරා ප්‍රතිකාර සඳහා නැවත ගුවන් හමුදාවට බාරදෙන අතර රෝහලේදී ඔහුගේ දෙපා ඉවත් කිරීමටද සිදුවේ. මින් ඔහුගේ පියාසර සිහිනය බිඳවැටුනද රෝහලේ නේවාසික සගයින්ගේ දිරිමත් කිරීම් මත බොරු කකුල් හා දීර්ඝ කාලයක් වෙහෙසවී කල ව්‍යායාම හා පුහුණුවීම් වලින් අනතුරුව නැවතත් පියාසර කිරීමේ බලා පොරොත්තුව ඉටු කරගනී. එවකට රුසියානු ගුවන් හමුදාවේ පැවති යම් නිර්දේශයන්ටත් අභියෝගයක් වෙමින් මේ දෙපා නැති නියමුවා. දෙපා ඇති නියමුවන් හා කරට කර තරග කරමින් ඔවුන් අභිබවමින් දක්ෂකම් දක්වයි. කෙතරම් බාධක අභියෝග පැමිණියද , තමා අබ්බගාතයෙකු වුවද , ඉවසීම, කැපවීම,පුහුණුව,අධිෂ්ඨානය මතින් තම ජීවිතය ජය ගනී. රුසියානු ජනතාවගේ දේශප්‍රේමීත්වයද , රණකාමීත්වයද මැනවින් ප්‍රදර්ශණය කරන මෙම කෘතියෙන් ලාංකීය ජන සමාජයට බොහෝ දේ ඉගෙනීමට තිබේ. සත්‍ය කතාන්දරයක් වන මෙය ලොව වටා විවිධ භාෂා වලට පරිවර්තනය වූ ලෝකප්‍රකට සාහිත්‍ය නිර්මාණයකි. ජීවිතයේ කල නොහැකි යැයි සිතන දේ කරන්න. බාධකවලට , අභියෝග වලට මුහුණ දෙන්න ඉගෙනගන්න කියවන්න සැබෑ මිනිසෙකුගේ කතාවක්......

සටහන - හිරුණ දියමන්ත

අම්මා සහ මිහිකත

නම - අම්මා සහ මිහිකත

කතෘ - චිංගීස් අයිත්මාතව්

පරිවර්තනය - දැදිගම . වී . රුද්‍රිගූ

ප්‍රකාශනය - සුසර ප්‍රකාශකයෝ

 මා සතු පිටපතේ මුද්‍රණය - 2013

මා සතු පිටපතේ මිල- රු 250/- (මෙම මිල මුද්‍රණය අනුව වෙනස් විය හැක)

රුසියාවේ හිට්ලර්ගේ ආක්‍රමණයෙන් පසුව ඇති වූ මහා යුද්ධයේදී තම පුතුන් දෙදනා සහ සැමියා මිය ගිය, ගෙවි ලියක ගේ, බිරිඳක ගේ, මවක ගේ ධෛර්ය සම්පන්න සහ ඉතා දුක්බර කතාව මෙම නවකතාවෙන් විස්තර කරයි.පොදු ජනයා අතර ඉතාම දිළිඳු මට්ටමේ සිට ඉහලට පැමිණි සාමාන්‍යය කිර්ගීස් කාන්තාවකගේ ආත්මීය ප්‍රකාශනයකි. යුද්ධයක් හේතුවෙන්  පීඩා විදින හමුදා සාමාජිකයන්ගේ පවුල් පිලිබඳවත්, යුද්ධයක් හමුවේ මහජනයා ගේ මානසික බිඳ වැටීමත් මැනවින් මෙම කෘතියෙන් ඉස්මතු කරයි. මෙහි ප්‍රධාන චරිතය තුලින් රුසියානුවන් ගේ උපතින් එන දේශානුරාගය පෙන්වයි. තම දරුවන්, තම සැමියා යුද බිමේදී මිය ගිය බවට එන පුවත් වලින් නොසැලෙන ඇය අහිමිවූ දෙයට වඩා හිමිවී ඇති දේ ආරක්ෂාකිරීමට උත්සුකවන සැබෑම මාතාවකි. ප්‍රකට රුසියානු ගත් කතුවරයෙකු වන චින්ගීස් අයිත්මාතව් ගේ කෘතියක්වන අම්මා සහ මිහිකත තුලින් දේශප්‍රේමියෙකුගේ රාගයද ගත් කතුවරයෙකුගේ කුසලතාවයද දැකිය හැකිය. මුළු මහත් සමාජීයය ජීවිතයද  වෙනස් කිරීමට සමත් වූ ජනතාවගේ වික්‍රමාන්විත ක්‍රියාදාමය ඉතා ශාස්ත්‍රීය අයුරින් විස්තර කරයි.

By - Hiruna Diyamantha

නිවන් දැක්මට පෙර

පූජ්‍ය ගංගොඩවිල සෝම හිමියන්ගේ ජීවිත කතාව නවකතා ශෛලියකින් ලියවී ඇති ග්‍රන්ථයක් ලෙස නිවන් දැක්මට පෙර දැක්විය හැකිය. ආගමික වත් පිලිවෙත් වලට පමණක් සීමා වූ භික්ෂූ පරපුරක් වැඩ සිටි යුගයක , භික්ෂූන් වහන්සේ කෙනෙකුගේ සැබෑ වගකීමත් , කාර්යභාරයත් , ශාසන කටයුතුත් පෙන්වාදුන් සෝම ස්වාමීන් වහන්සේ අන්තවාදී කල්ලි විසින් අපවත් කරන තුරාවට කල උතුම් ශාසන මෙහෙය මැනවින් විස්තර කරන ග්‍රන්ථයකි. ගිහි පැවදි ආගම් ජාති භේදයකින් තොරව සැමට එකසේ කියවිය හැකි මෙන්ම මේ සැමටම ජීවිතයට බොහෝ ආදර්ශද මෙම කෘතියෙන් ලබාගත හැකිය.

නම - නිවන් දැක්මට පෙර

කතෘ - බෙන්තොට රොබට් විජේසේකර

ප්‍රකාශනය - පවර ප්‍රකාශකයෝ

මා සතු පිටපතේ මුද්‍රණය - 2005 සැප්තැම්බර්

මා සතු පිටපතේ මිල - රු 260/-

ගුරු තරුව ඔබයි.........

ගුරු තරුව ඔබයි.........
ශිෂ්ඨාචාරගත නොවූ සිසු පිරිසක් ... එහෙමත් නැත්නම් දඩබ්බර නූගත් පාදඩයන් ගානට වැටුනු සිසු පිරිසක්... සමාජයෙන් ගුරුවරුන්ගෙන් කෙතරම් කොන් වෙනවාද... සිසුන්ගේ වැරදිවලට දඩුවම් කිරීමෙන්ම සිසුන් වෙනස් කරන්න පුලුවන්ද?.. උගන්වන්න බෑ.. හදන්න බෑ.. මුන්ට ඉගෙනගන්න බෑ... මුන්ගෙ හැදියාවක් නෑ... කියල කෑ ගහන ගුරුවරු පිරිසක් තුල සිසුවෙක්ට තම වැරදි අඩුපාඩු හදාගෙන ගොඩ එන්න පුලුවන්ද... සමාජයෙන් පමණක් නෙවෙයි සිසුන්ගෙන් පවා කොන් උන චරිතයකට සිසුන්ගේ අඩුපාඩු හදල සිසුන්ව යහ මගට ගන්න පුලුවන්ද?... එහෙම චරිත ඉන්නෙ කතා පොත් වල විතරමද?.......... මෙන්න ඒ හැම එකටම පිලිතුර............. දහසක් ගුරුවරුන් අතර සැබෑ ගුරුතුමෙක් ගැන කියවෙන .... ගුරු තරුව ඔබයි.......................
මහත්මා ගති ගැන මහ ලොකුවට කතා කරන .. මානව අයිතිවාසිකම් වගේ ලොකු මාතෘකා ගැනත් ලොකුවට කතා කරන එංගලන්තයේ එක්තරා යුගයක කලු ජාතිකයන්ට පහත් විදියට සැලකුවා.... එහෙම කාලයක මුඩුක්කු පරිසරයක හැදුනු ශිෂ්ඨාචාරයෙන් බැහැර උනු... නිවැරදි වචනයෙන් කියනවනං පාදඩ වෙච්ච , හදන්න බෑ උගන්වන්න බෑ කියල අහකදාපු පාසල් කොල්ලො කෙල්ලො ටිකකට ජීවිතයේ නිසි මග කියල දෙන “පෙන්වා මග - නොමග නොවැටී යන සැටි” පෙන්වාදෙන සැබෑ ගුරුතුමෙක්ගේ කතාව ... නිවැරදිම වචනෙන් කියනවනම් ගුරු තරුවකගේ කතාව මේ ගුරු තරුව ඔබයි පොතෙන් ගෙන එනව.... පාසල් ගුරුමන්ඩලයෙන් විතරක් නෙවෙයි සිසුන්ගෙනුත් තමුන්ගේ කලු හමට එන අපහාස උපහාස තඹේකට මායිම් නොකර ... සිසුන්ගේ ජීවතයේ වැරදුන තැන් සොයා පිලියම් කරමින් සිසුන්ට අලුත් ජීවිතයකට යහපත් අනාගතයකට මාර්ගය හදන මේ ගුරුතුමා .. ගුරුතුමෙකුගේ කාර්යභාරය පොත පත දැනුම දීම පමණක් නොව ජීවිතය සමාජය යහපත් ගති පැවතුම්ද ඉගැන්වීම බව පෙන්වනවා... ගුරුවරු අතර සැබෑ ගුරු පියෙක් වන මේ ගුරුතුමාගේ කතාව තවත් එක් ප්රදබන්ධයක් නොවී සත්යම කතාවක් වීමත් විශේෂත්වයක් වෙනවා... මේ පොත කියවා මම තේරුම්ගත් දේ නම් “වන සීපාවුන් වැනි මිනිසුන් මැද දෙවි දේවතාවුන් වැනි මිනිසුන් ඇත” කියන එකයි.... ඕනෑම කෙනෙකුට කියවල රසවිදින්න පුලුවන් මේ පොත කියවනකොට තමන්ගෙ ජීවිතයේ යහපත් විදියේ වෙනසකට හේතු උන ගුරුතුමෙක් ගුරුතුමියක් මතක් වේවි... මේ පොත සෑම ගුරුවරයෙක්ම අනිවාරයෙන් කියවිය යුතු පොතක් කියල මම හිතනව...... මම මගේ ගුරුතුමෙක්ට හරි ගුරුතුමියකට හරි තෑග්ගක් දෙනකොට මේ පොතේ                                                                           පිටපතක් වරද්දන්නෙ නෑ...

නම - ගුරු තරුව ඔබයි
කතෘ - එඩ්වඩ් රිකාඩෝ බ්රේනත්වෙට්
පරිවර්තනය - මුදිත ගුණතිලක
ප්‍රථම මුද්ර්ණය - 2006
ප්‍රකාශනය - විජේසූරිය පාඨක පදනම ,812, මරදාන පාර, පුංචි බොරැල්ල.
ISBN – 955-1387-84-8
ප්රNතම මුද්රිණයේ මිල - රු 200

**** මෙම කෘතියම සිරිල් චන්ද්‍රසේකර ගුණවර්ධන විසින් “ආදරණීය ගුරුතුමනි” නමින් පරිවර්තනය කරා
එහි ප්‍රකාශනය සරසවි ප්ර්කාශකයෝ, ISBN 955-573-275-2